美好腳蹤系列有聲繪本

大喉嚨牧師和他的油燈 駱先春的故事【台語故事線上聽】

點閱次數:432

大嚨喉空牧師和伊的油攑仔(iû-kia̍h-á)

                ——駱先春(Lo̍h Sian-chhun)的故事

 

 

烏mà-mà的山頂,細細葩的光點沓沓(tau̍h-tau̍h)倚近,佇細條路仔連鞭光連鞭暗,閣連鞭倒爿、連鞭正爿幌--咧幌--咧,愈來愈光。

 

紲(Sòa)--落,傳來一陣歌聲,猶閣有「phok、phok、phok」

mòo-tà的聲,愈來愈響亮。囡仔一下聽著遠遠的聲,攏趕緊走去厝外。

 

「大嚨喉空牧師來矣!」

 

 

逐家共大嚨喉空牧師彼台神奇mòo-tà跤踏車,猶閣有吊佇車頂的油攑仔圍咧,毋管看過幾遍,猶是感覺真新鮮(sin-sian)

 

彼時部落猶無燈火,暗時kan-na有月光和星光,但是大嚨喉空牧師的油攑仔實在足光足光。

 

大嚨喉空牧師講:「這油攑仔是一位外國宣教師送--我--的,只要先灌油入去,點火,就會得通照光規个埕斗,是我暗時佇野外佈道的好朋友。」

 

 

大嚨喉空牧師總--是天暗了後才出現,因為日--時大人攏咧無閒,伊就趁暗時逐家食飯飽才來拜訪。

伊共油攑仔吊佇埕--裡,逐家共圍咧,聽伊講道理和唱詩歌。唱詩歌的時無伴奏,就幾十个會友做伙唱,一首紲一首,總--是唱到足晏(òaⁿ)才煞。

 

見若伊來到部落,逐家就會聚集做伙,真快樂咧唱歌。若聽著伊響亮的歌聲,逐家就足歡喜。

 

 

不過,拄開始毋是按呢喔。大嚨喉空牧師拄來到部落的時,逐家攏毋捌--伊,毋知伊來欲創啥,猶有人提牛屎共(khian)。

 

彼時,伊並無受氣,kan-na用日語講:「感謝,這是恩惠,願上帝祝福--你。」

 

躼躼瘦瘦的大嚨喉空牧師,講話真大聲,伊一个人的聲贏過幾若个,但是伊對人煞足客氣。

 

 

有時佇路裡拄著族人唱歌,大嚨喉空牧師會問講:「恁唱歌予我聽,我嘛唱歌予恁聽,好--無?」

 

有寡人會講:「無啉酒唱袂出來啊!」

 

大嚨喉空牧師就會共伊講:「我是信耶穌的人,無啉酒,因為啉酒會傷害咱的身體。恁愛綴我信耶穌,伊會救--恁,予恁真正幸福。」

 

 

起頭kan-na細漢囡仔綴伊行,