美好腳蹤系列有聲繪本

消失的銅像 八田與一技師的故事【台語故事線上聽】

點閱次數:654

「銅像無去矣!」

「八田與一的銅像無去矣!?」

「敢會予人提去熔掉矣咧?」

農民目箍紅紅,chhi-bú-chhi̍h-chhū咧議論。

 

這是日本政府統治台灣上尾幾年發生的代誌,毋但八田與一的銅像消失矣,全台灣的銅像嘛攏消失矣。

 

 

當時是二次大戰,日本政府徵收全台灣的銅鐵金屬去製造武器,逐家相信八田與一的銅像嘛無法度走閃予人熔掉的命運。

 

不而過,八田與一的銅像並無予人熔掉,是去予人偷偷仔藏起來矣。

是按怎會有人敢違背日本政府的命令,偷偷仔藏銅像咧?

八田與一到底是啥人咧?

 

八田與一是一位日本來的土木技師。伊佇日本統治台灣初期,受台灣總督府土木局指派,到嘉南平原進行土地測量。

伊發現遮沿海地區塗壤的鹽份傷懸,內陸地區雨季會做大水,洘旱的時土地規个焦涸涸,作物收成䆀,農民干焦會得看天食飯。

 

看著這片土地,八田與一.定無自覺用指頭仔捲頭毛思考,到底欲按怎予每一坵田攏有水通灌溉,來增加農作物的產量,改善農民的生活咧?


 

斟酌思考了後,伊想出一个毋但佇日本、連全亞洲都無人做過的大計畫:一个不止仔大的水庫和運送灌溉水的水圳。

 

八田與一向長官提出這項計畫。雖然計畫規模傷大,需要足濟經費,但是伊有把握予這片平洋重頭生,改善農民的生活。

 

長官了解八田與一這項灌溉工程真有遠見,對嘉南平原會有足大的幫贊,決定強力支持這項計畫。

 

 

起水庫需要濟濟人來鬥相共,八田與一講:

「員工需要有親人陪伴,生活快樂才會當專心工作。」

伊為員工和的親人起宿舍、病院、學校、福利社、網球場、射箭場和游泳池,猶閣時常佇戶外放電影。

八田與一的家後~外代樹和囡仔嘛搬來佮伊做伙蹛。

 

當員工受著Ma-lá-lí-ah威脅的時,八田與一和外代樹就一戶一戶要求食特效藥「khi-nih-neh」,預防感染。

 

建造工程真熱烈咧進行,八田與一猶閣去到外國買大型機具,予水庫的駁岸建造進度加較緊。

 

欲起又閣懸又閣長的駁岸需要大量的石頭和塗沙。八田與一閣鋪設鐵枝路,用火車來載塗土石,倒佇駁岸頂面,才閣請農民牽牛來踏,共塗石硩甲實實實。

 

八田與一為欲予夠額的水量進入水庫,需要匯集兩條河川。伊照計畫,共隔佇兩條河之間的山拍通一條磅空,予兩爿的水透流。

 

 

料想袂到,原本進行順利的工程煞發生磅空爆炸事件,有五十外人不幸過身。

這个事件予八田與一艱苦甲無法度繼續工作。但是眾人共伊講:「若這馬放棄,這片土地又閣會轉去到原本的無水通用,請較有元氣咧,若無,員工的犠牲就無意義矣。」

就按呢,八田與一重新振作起來,無想到這時又閣拄著另外一个難關。

 

 

當時日本發生嚴重的地動,起水庫和水圳的經費愛用佇救災,台灣這爿干焦有法度付一半員工的工錢。

 

「就予能力好的工人離開!」八田與一講:「因為欲閣揣頭路真簡單,若予能力較無好的人離開,的生活就會出問題。」

 

八田與一雖罔毋願猶是留目屎和欲離開的員工約束,一定會替揣著新頭路,將來嘛會閣再揣轉來。所有的員工攏綴咧目屎四淋垂(sì-lâm-sûi)。

 

 

後--來日本政府恢復撥經費,工程全面復工,原本離開的員工攏閣予八田與一揣轉來做工課,烏山頭水庫和嘉南大圳總算完工矣。

 

佇舉行通水典禮的同時,水庫邊仔設立一座殉(sûn)工碑,頂頭刻佇起水庫和大圳期間因為事故、著病過身的員工和親人的名。八田與一特別要求講:「名的前後順序愛照過身時間,毋通分階級,嘛毋通分日本人抑是台灣人。」

 

為欲感謝八田與一,員工和農民想欲為伊造一身銅像,結果一再予八田與一拒絕。後- -來伊知影這是逐家的心意,目的是為著記念八田與一的計畫改變嘉南平原這个事蹟,伊才勉強同意。

 

銅像(chhāi)起去了後過十外年,二戰期間,八田與一予人調去菲律賓,煞不幸佇路途中遇船厄過身,無閣再轉來台灣。

這身銅像嘛因為戰爭的緣故,綴咧消失矣。

 

 

二戰結束,日本人著愛離開台灣。

 

這時台灣新政府規定,徵收所有日本人留落來的物資。

管理嘉南大圳的員工,佇清點倉庫的時發現掠準佇戰爭中予人徵收的八田與一銅像。員工決定違背新政府的命令,偷偷仔共銅像藏起來。過三十外年後,才通囥轉去烏山頭水庫,予這座銅像重見天日。

 

 

八田與一所設計的嘉南大圳,引進清氣的水,潤澤農民所種作的土地,閣予當年鹽份傷懸的地區變做好田地。

就若八田與一所期待的,佇大圳完成了後,農民的收成和生活攏變閣較好矣。

 

 

逐年5- -月,八田與一的忌日,逐家攏會聚集佇八田與一的銅像邊仔,當看水庫這一大片青leng-leng、閃閃爍的水面的時,心內充滿對八田與一無限的懷念和感謝。